• Advertisement
  • Contact
  • Chandrapur
More

    विद्यार्थ्यांना शिष्यवृत्ती अर्ज भरण्यासाठी मुदतवाढ

    चंद्रपूर दि. 23 जुलै : भारत सरकार मॅट्रिकोत्तर शिष्यवृत्ती योजनेअंतर्गत अनुसूचित जाती, विमुक्त जाती, भटक्या जमाती, इतर मागासवर्ग व विशेष मागास प्रवर्गातील विद्यार्थ्यांसाठी महाडीबीटीच्या संकेत स्थळावर अर्ज भरण्याची सुविधा उपलब्ध आहे. सदर संकेत स्थळावर शिष्यवृत्तीचे अर्ज भरण्यासाठी दि. 5 ऑगस्ट 2021 पर्यंत मुदतवाढ देण्यात आली आहे.
    कोविड-19 विषाणूच्या संसर्गामुळे काही महाविद्यालये बंद आहेत. ऑनलाइन पद्धतीने अभ्यासक्रम शिकविला जात असल्यामुळे विद्यार्थी महाविद्यालयात उपस्थित राहू शकत नाही. ज्या विद्यार्थ्यांनी शिष्यवृत्तीचे ऑनलाईन अर्ज सादर केलेले नाहीत, असे विद्यार्थी शिष्यवृत्तीपासून वंचित राहू नये यासाठी शासनाने अर्ज भरण्यास मुदतवाढ दिलेली आहे.
    नागपूर विभागातील महाविद्यालयामध्ये सन 2020-21 मध्ये प्रवेश घेतलेले व शिष्यवृत्तीचा लाभ घेऊ इच्छिणाऱ्या विद्यार्थ्यांनी त्यांचे अर्ज तात्काळ https://mahadbtmahait.gov.in या संकेत स्थळावर ऑनलाइन स्वरूपात सादर करावेत. विभागातील सर्व महाविद्यालयांनी महाविद्यालय स्तरावर प्रलंबित असणारे अर्ज लवकरात लवकर ऑनलाइन प्रणालीतून संबंधित जिल्ह्याचे सहाय्यक आयुक्त, समाज कल्याण कार्यालयाकडे वर्ग करावेत, असे आवाहन समाज कल्याण विभागाचे प्रादेशिक उपायुक्त डॉ. सिद्धार्थ गायकवाड यांनी केले आहे.
    0000
    वृत्त क्र. 726
    मुदतबाह्य अन्नपदार्थ आढळल्या प्रकरणी
    हल्दीरामला अन्न व औषध प्रशासनाची नोटीस
    चंद्रपूर दि.23 जुलै : शहरातील मे. प्लॅनेट फूड ओम इंडस्ट्रीज इंडिया प्रा. लि.( हल्दीराम) या पेढीची अन्न व औषध प्रशासन विभागाने तपासणी केली असता तेथील स्वीट चीली सॉस, पाणीपुरी, बारीक आग्रा

    सेव, बेसन इत्यादी अन्नपदार्थ मुदतबाह्य असल्याचे आढळून आले. तसेच तपासणीदरम्यान पेढीमध्ये माशांचा वावर आढळून आला. तसेच कामगारांची वैद्यकीय तपासणी केल्याचे आढळून आले नाही, स्निग्ध पदार्थ व इतर पदार्थ कोणत्या माध्यमात तयार केली जातात, याचे निर्देश फलक नाही, स्टोअर रूममध्ये खाद्य व अखाद्य पदार्थ एकत्र साठवलेले आढळले. तसेच सदर पेढीने (हल्दीराम) विनापरवाना पेढीकडून अन्नपदार्थाची खरेदी केल्याचे आढळले नाही.
    अन्न सुरक्षा व मानके कायदा 2006, नियम व नियमन 2011 च्या विविध तरतुदींचे उल्लंघन केल्याप्रकरणी मे.प्लॅनेट फूड (हल्दीराम) या पेढीला अन्न व औषध प्रशासनाकडून नोटीस बजावण्यात आली आहे. नोटीसच्या उत्तराच्या अनुषंगाने अन्न व औषध प्रशासनामार्फत पुढील कारवाई करण्यात येईल.
    अन्न व्यवसायिकांनी अन्न सुरक्षा व मानके कायदा 2006, नियम व नियमन 2011 अंतर्गत नियमांचे पालन करूनच अन्न व्यवसाय करावा. तसेच ग्राहकांना कोणत्याही प्रकारच्या अन्नपदार्थांची तक्रार असल्यास अन्न व औषध प्रशासन, प्रशासकीय भवन, दुसरा माळा, खोली क्र. 21 व 22, चंद्रपूर येथे संपर्क साधावा, असे अन्न व औषध प्रशासन विभागाचे, सहाय्यक आयुक्त नितीन मोहिते यांनी कळविले आहे.
    00000
    वृत्त क्र. 727
    धान पिकावरील तुडतुड्यांचे एकात्मिक व्यवस्थापन
    चंद्रपूर दि.23 जुलै : भातावर तपकिरी तुडतुडे, हिरवे तुडतुडे आणि पांढरे तुडतुडे असे तीन प्रकारचे तुडतुडे बागायती पाणथळ क्षेत्रामध्ये आढळून येतात. त्यापैकी तपकिरी तुडतुडे सर्वात जास्त हानीकारक आहेत. ही कीड पाण्याचा निचरा योग्य प्रमाणात न होणाऱ्या, घन लागवड केलेल्या आणि नत्र खताची मात्रा वाजवीपेक्षा जास्त प्रमाणात दिलेल्या शेतात प्रामुख्याने आढळून येते.
    त्याबरोबर 28 अंश से. ते 30 अंश से. तापमान, 85 टक्के पेक्षा जास्त आर्द्रता आणि कमी पाऊस या किडीचा प्रादुर्भाव वाढण्यास पोषक ठरतो. तुडतुडे व त्यांची पिल्ले सतत खोडातील अन्नरस शोषून घेतात, त्यामुळे रोपांची पाने पिवळी पडतात. उपद्रव मोठ्या प्रमाणावर असेल तर रोपे वाळतात व जळल्यासारखी दिसतात. शेतात ठिकठिकाणी तुडतुड्यांमुळे करपून गेलेले गोलाकार भाताच्या पिकाचे खळे दिसतात. यालाच “हॉपर बर्न” असे म्हणतात. अशा रोपांना लोंब्या येत नाहीत आणि आल्याच तर दाणे न भरता पोचट राहतात.
    तरी शेतकरी बांधवांनी आपल्या पिकाचे नियमित सर्वेक्षण करावे. सर्वेक्षणासाठी प्रत्येक बांधीतील वेगवेगळ्या ठिकाणावरील दहा चुडांची निरीक्षणे घ्यावीत व धानाच्या बुंध्यावरील तुडतुड्यांची संख्या मोजून सरासरी प्रति चूड किती तुडतुडे आहेत, ते मोजून घ्यावेत. 10 तुडतुडे प्रती चूड रोवणी ते फुटवे अवस्थेपर्यंत, 10 तुडतुडे प्रती चूड फुटवे ते दुधाळ अवस्थेपर्यंत आढळल्यास नियंत्रणाचे उपाय योजावेत. असे आवाहन कृषी विभागाचे, कृषी संचालक (विस्तार व प्रशिक्षण) विकास पाटील यांनी केले आहे.
    असे करा एकात्मिक कीड व्यवस्थापन:
    तुडतुडयांचा प्रादुर्भाव नियंत्रणासाठी लावणी दाट करू नये. दोन ओळीतील अंतर 20 सें.मी. आणि दोन चुडातील अंतर 15 सें.मी. ठेवावे तसेच रोपांची पट्टा पध्दतीने लागण करावी. नेहमी प्रादुर्भाव होणाऱ्या शेतात नत्र खताची मात्रा वाजवी प्रमाणात द्यावी. शेतातील पाण्याचा निचरा नियमित करावा, पाणी बदलावे.
    टेहळणीसाठी प्रकाश सापळ्यांचा वापर करावा. प्रत्येक चुडात 10 तुडतुडे या आर्थिक नुकसान पातळीच्या आधारे किटकनाशकाची फवारणी करावी.
    यासाठी हेक्टरी 500 लिटर पाण्यात इमिडाक्लोरोप्रीड 17.8 टक्के 125 मि.ली. किंवा थायामिथॉक्झाम 25 टक्के डब्ल्युजी 100 ग्रॅम किंवा क्लोथियानिडीन 50 टक्के 25 ग्रॅम किंवा बुप्रोफेजीन 20 टक्के + फिप्रोनील 3 टक्के एससी 500 मि.ली. मिसळून फवारावे किंवा इथोफेनप्राक्स 10 टक्के 500मि.ली. किंवा फेनोबुकार्ब (बी.पी.एम.सी.) 50 टक्के 600 मि.ली. या प्रमाणात फवारणी करावी. फवारणी करतांना कीटकनाशक फुटव्याच्या बुंध्यावर पडेल याची दक्षता घ्यावी. आठवडयानंतर परत प्रादुर्भाव आढळल्यास दोन ते तीन फवारण्या कराव्यात, कीटकनाशके बदलून वापरावीत.
    00000

    वृत्त क्र. 728
    स्थानिक नैसर्गिक आपत्ती अंतर्गत शेतक-यांनी पीक
    नुकसानीच्या पूर्वसूचना देण्याचे आवाहन
    चंद्रपूर दि.23 जुलै : खरीप हंगाम 2021 मध्ये प्रधानमंत्री पीक विमा योजना राज्यात राबविली जात आहे. या योजनेत सहभागी झालेल्या शेतकऱ्यांना स्थानिक नैसर्गिक आपत्ती (Localized Calamities) या जोखीमेच्या बाबीअंतर्गत गारपीट, भूस्खलन, विमा संरक्षित क्षेत्र जलमय झाल्यास, ढगफूटी, वीज कोसळल्यामुळे लागणारी नैसर्गिक आग या स्थानिक नैसर्गिक आपत्तीमुळे नुकसान झाल्यास विमा संरक्षण प्राप्त होते.
    माहे जुलै महिन्यामध्ये राज्यातील काही भागात अतिवृष्टीने तसेच पूरसदृश्य परिस्थिती निर्माण झाल्याने शेत पिकांचे नुकसान झाल्याचे निदर्शनास येत आहे. पीक विमा संरक्षण घेतलेल्या अधिसूचित पिकांचे उपरोक्त बाबींमुळे नुकसान झाल्यास पीक नुकसान भरपाई मिळण्यासाठी शेतकऱ्यांनी शेत पिकांचे नुकसान झाल्यापासून 72 तासामध्ये विमा कंपनीस देणे आवश्यक आहे.
    स्थानिक नैसर्गिक आपत्ती या जोखीमेअंतर्गत विमा संरक्षण घेतलेल्या शेतकऱ्यांनी सर्व्हे नंबर नुसार बाधित पीक व बाधित क्षेत्राबाबत घटना घडल्यापासून 72 तासांच्या आत क्रॉप इंश्युरंन्स ॲप, संबंधित विमा कंपनीचे टोल फ्री क्रमांक, बँक, कृषि व महसूल विभाग यांना कळवावे. नुकसान कळवितांना सर्व्हे नंबर व नुकसानग्रस्त क्षेत्र तपशील कळविणे बंधनकारक असेल. या बाबी अंतर्गत नुकसान भरपाई मिळण्यासाठी झालेल्या पीक नुकसानीबाबतची पूर्वसूचना शेतकऱ्यांनी 72 तासादरम्यान वैयक्तिकरित्या मोबाईल ॲपद्वारे, विमा कंपनीच्या टोल फ्री क्रमांक अथवा लेखी स्वरुपात विमा कंपनीच्या तालुका,जिल्हा कार्यालयात किंवा कृषी,महसूल विभागास देणे आवश्यक आहे.
    याबाबत अधिक तपशिलासाठी तात्काळ नजीकच्या विभागीय कृषी सहसंचालक, जिल्हा अधिक्षक कृषी अधिकारी, उपविभागीय कृषी अधिकारी, तालुका कृषी अधिकारी यांच्या कार्यालयाशी संपर्क साधावा, असे कृषी विभागामार्फत कळविण्यात आले आहे.